PIDATO BAHASA JAWA : WIGATOSIPUN PAWIYATAN KARAKTER SISWO NU

Warta Madrasah – sahabat warta madrasah berikut kami berikan contoh teks Pidato Bahasa Jawa dengan judul wigatosipun pawiyatan karakter siswo NU

السلام عليكم ورحمة الله وبركاته

اَلْحَمْدُ للهِ رَبِّ الْعَالَمِيْنَ. وَالصَّلاةُ وَالسَّلاَمُ عَلَى سَيِّدِنَا مُحَمَّدٍ. وَعَلَى آلِهِ وَصَحْبِهِ أَجْمَعِيْنَ

Dewan juri, engkang kulo mulyaaken saha para rawuh

Mboten wonten atur engkang trep kula kunjokaken wonten ngarsa dalem Allah kejawi raos sukur, awit kanthi rahmat, taufiq saha hidayahipun kita saget makempal dados setunggal wonten majlis engkang mubarak menika. Solawat serta salam mugiyo katur dumaten kanjeng Nabi  Muhammad Rasulullah SAW, keluarga saha sahabat lan penderekipun.

Wonten kalodhangan menika kula badhe ngaturaken tanggap wacana basa jawi kanthi topik “wigatosipun pawiyatan karakter siswo NU”.

Kualitas bangsa ingkang sahe menika kedah dipun udi, kawiwitan saking pawiyatan. Napa menika pawiyatan para rawuh? Pawiyatan menika proses ingkang dangu kagem pikantuk salah satunggaling ancas saha kangge nampi ide mawi konsep ingkang enggal. Sahengga lumereg saking pawiyatan kaajab saget kapetik asilipun ugi saget nuwuhakaen budhaya engkang enggal kanthi titah ingkang cerdas, lan nggadahi  seserepan engkang inggil.

Minangka warga Negara, mliginipun kita, siswa ma’arif ingkang cumondok wonten organisasi ageng NU. Kedah anggadahi kawicaksanaan ingkang trep saha leres sak sampunipun kita saget ngindit sains saha teknologi. Budhaya islami kedah saget kita cakaken wonten madyaning bebrayan agung purih saget damel corak ingkang  langkung sahe wiwit papan angga sarira ngantos sadengah papan.

Dewan juri, engkang kulo mulyaakensaha para rawuh Kathah sanget patuladhan dipun dhawuhaken dining Al-Qur’an lan Hadits  ngingingi hal-hal ingkang sesambetan kaliyan underaning pawiyatan karakter saha mental.                                                  

Wonten 3 perangan ingkang badhe kula aturaken wonten kalenggahan menika:

Anggadhahi tauhid ingkang mantap

Salah satunggalipun bab ingkang mboten saget kita selaki saha ingkari inggih menika masalah tauhid. Tauhid minangka dasar ugi landesanipun tiyang islam. Kanthi tauhid, manungsa badhe wilujeng, gesang sekeca wonten donya ngantos akherat. Dawah kosok wangsulipun syirik mujudake lampah kaningaya, dosa ingkang ageng saha panggesangan ingkang nista saha papa cintraka.Kados dhawuhipun Allah, nyariosaken Luqmanul Hakim suka paring wejangan  dhateng putranipun

وَاِذْ قَالَ لُقْمَانُ لِاِبْنِهِ وَهُوَ يَعِظُهُ  يَبُنَىَّ لَاتُشْرِكْ بِاللهِ إِنَّ الشِّرْكَ لَظُلْمٌ عَظِيْمٌ

Artosipun: nalikane Luqman dhawuhi putranipun saklebetipun maringi pitutur, duh anakku… awakmu aja nganthi gawe sekuthon marang Gusthi Allah sebab iku tumindhak syirik lan nganingaya engkang gedhe

Kanthi iman ingkang leres saha mantep, tiyang badhe mindhak taqwanipun dhateng Allah SWT, ateges remen nindhaki sedaya printah-printahipun saha nebihi awisanipun. Langkung-langkung kita minangka putra-putri Ahlussunnah wal Jama’ah annahdliyah kanthi madzhab Asy’ariyah saha Maturidiyah kedah tumemen anggen kita nulad saha nderek lampah syari’atipun Rasulillah saha para Ulama’ kita. Midherek dhawuh Luqmanul Hakim, kaajab para tiyang sepuh saestu saget merhatosaken saha paring panjurung dhateng putra-putri tumuju tumindhak ingkang sahe ugi akhlaq ingkang karimah.

Anggadahi Akhlaqul Karimah.  

Putra-putri NU kaajab anggadhahi akhlaqul karimah, mliginipun sifat jujur. Jujur dhateng solah bawa, tindak tanduk ugi wicanten. Jujur lumereg dhateng kesahenan, kesahenan suka ancas tumuju suwarga.                                                      

Kados dhawuhipun Rosulillah SAW :

عَلَيْكُمْ بِالصِّدْقِ فَاِنَّ الصِّدْقَ يَهْدِيْ اِلَى اْلبِرِّ وَ اِنَّ اْلبِرَّ يَهْدِيْ اِلَى اْلجَنَّةِ  

Artosipun : Sira kudu tumemen nindaki kajujuran, awit jujur tumuju kabecikan, kabecian tumuju marang suwarga.

Saking hadits menika, saget kita tulad, langkung-langkung siswa NU kedah anggadhahi sifat jujur, pawongan ingkang jujur menika badhe teguh ngemban amanah. Sifat lan watak amanah kedah nyawiji dhateng angga trusing wardaya kangge sadengah pelajar NU.                                                                                         

Dewan juri,engkang kulo mulyaakensaha para rawuh

Anggadhahi tanggung jawab  

Kita minangka hamba Allah, mboten saget nyingkir saking taklif ingkang tindakake. Amal sahe ingkang kita tindaki ing tembe bade kawales kanthi murwat. Sedaya amal badhe dipun suwun pertanggung jawabanipun dhateng Allah SWT. Kados dipun dhawuhaken ing Al-Qur’anul Karim:      

                                                

فَمَنْ يَّعْمَلْ مِثْقَالَ ذَرَّةٍ خَيْرًا يَّرَهُ ، وَمَنْ يَّعْمَلْ مِثْقَالَ ذَرَّةٍ شَرًّا يَّرَهُ       

Artosipun: sapa wonge ngelakoni kabecikan sak biji sawi, deweke arep weruh piwalese. Sebalike sapa kang nindaki ala sak biji sawi dheweke arep weruh kang dadi piwalese (Q.S Az-Zalzalah :7-8).

Dewan juri,engkang kulo mulyaaken saha para rawuh

Wonten kalodhangan menika kula ngajak dhateng panjenengan sedaya monggo kita sami tumemen ngudi ugi merhateaken pawiyatan karakter kanthi nindakaken budaya islami ing pangajab saget mujudaken bebrayan agung ingkang ideal lahir trusing batin. Ngingingi dhateng tiyang sepah sampun ngantos supe anggenipun sukaparing kawigatosan saha lampah ingkang saget dipun tulad putra-putrinipun    lumereg kemajengan ugi keindahaning swasana.      

                                                     

Dewan juri, engkang kulo mulyaaken.     saha para rawuh

Kangge mungkasi atur kula  wonten andharan kalodhangan menika saget kita simpulaken, mekaten : wigatinipun pawiyatan karakter tumuju bebrayan ideal mbetahaken sarana budhaya islami udakara 3 perkawis:                                               

1. kedah anggadhahi tauhid ingkang leres

2. kedah anggadhahi akhlaqul karimah

3.kedah anggadhahi raos tanggung jawab

Kanthi nindhakaken 3 sarana ing ngajeng punika ingkang kita kajengaken pikantuk wohing gati saha ridloning Gusti. Amiiin….

Sak derengipun kulo tutup pidato kulo, monggo kito resapi tembung maskumambang niki:

Bocah kudu bekti  ngati ati yekti

Mrih nemu panjangka

Bisa mulya tembe mburi

Urip sinartan ngibadah 

Mekaten, mboten kathah ingkang kula aturaken. Kathah atur mahanani kathahing kalepatan. Pramila saking sedaya kalepatan awit purwa, madya, saha wusana nyuwun agunging pangapunten.

و الله الموافق الي اقوام الطر يق                                                   

والسلا م عليكم ورحمة الله و بركاته

Tweet